من 5-7 مرات وتودع أي عادة سيئة إن شاء الله

من طرف مسلم الأربعاء مارس 04, 2009 6:17 pm

السلام عليكم
رغم اني بحب الفصحى إلا اني حاسة ان الموضوع دا محتاج عامية .....لسهولة التعبير يعني

مش عارفة بالضبط ممكن ابدأ الموضوع دا من أي نقطة ........لكن ممكن نقول
إن معظم العادات السيئة كان فيه موضوعات شرحت اضرارها وأخطارها وبالتالي
لا يوجد داعي اني اتكلم فيها .......وفيه موضوعات شرحت حكمها من ناحية
الشرع .. .....انا هاتكلم من زاوية اضيق شوية لكن أعتقد انها مهمة
مبدئيا ممكن نقسم العادات السيئة قسمين
1- عادات تمارس بشكل منتظم .......إدمان يعني .....سواء كان سجائر ..مخدرات .....شيشة .....الخ
2- عادات تمارس بشكل غير منتظم ......يعني واحد مش مدمن بانتظام لكن ممكن
يشرب مع أصحابه م اللي بيشربوه : سجاير ....شيشة .....خمر ...الخ

طبعا كلامي التالي لأي واحد نفسه يتخلص من أي عادة سيئة .......واللي
معندوش عزيمة مش هاقوله دوس ال x اللي ف ركن الصفحة وامشي .....لأ يعني
جرب تسمعنا

هاتكلم عن النوع التاني الأول :
لو واحد بيعمل اي عادة سيئة بشكل مش منتظم....حسب الظروف يعني ....دا ممكن
نقول انه جواه خير وشر ........طيب العادات دي فيهاجزء طبعا وسوسة شيطان
......خصوصا ف الأول قبل الإدمان .....طيب نعمل إيه ف الشيطان دا؟ نخليه يبطل يوسوس!!!!! إزاي؟
أقولك : نفترض مثلا إنه عمل اي عادة سيئة .....خلاص "إن الحسنات يذهبن
السيئات" ..والنبي صلى الله عليه وسلم قال -صلوا على النبي- "أتبع السيئة
الحسنة تمحها" يبقى يقوم يصلي ركعتين! بس كدا .........صعبة دي؟ أفتكر لأ
طيب كرر الغلطة تاني يوم يعمل إيه ؟ يصلي 4 ركعات! تاني؟ يصلي 6
........ولازم يحرص عليهم .....هييجي وقت والشيطان لن يزين له المعصية
........ليه؟ لأنه أصلا هدفه إنه يبعدك عن ربنا ......لا بيفكر ف صحتك ولا المجتمع ولا حاجة! بس يبعدك عن ربك
"قال فبعزتك لأغوينهم أجمعين" هو دا هدفه ........لو لقى إن وسوسته بتخليك
تصلي هيسكت ......يمكن كمان يفكرك : عايز تعمل إيه؟ دانت لو عملتها هتصلي
16 ركعة ......اقعد يا عم! خد واحد كابوتشينو احسن!
طبعا المسألة عمرها ما هتكون سهلة كدا........لكن لازم تواظب على الركعات!وتزود 2 كل مرة!
طيب مقدرتش تكمل العدد لأي سبب؟ يبقى عليك دين .....لازم تسدده

طيب أنا بانسى أو مبلاقيش وقت لل 18ركعة اللي عليا أعمل إيه؟ بدل كل
ركعتين هاتلك سبحة او عداد وقول سبحان الله وبحمده 100 مرة واستغفر 100
مرة وقول" اللهم أنت ربي لا إله إلا أنت خلقتني وانا عبدك (أمتك للبنات)
وأنا على عهدك ووعدك ما استطعت أعوذ بك من شر ما صنعت أبوء لك بنعمتك علي
وأبوء بذنبي فإنه لا يغفر الذنوب إلا انت" .......أفتكر دول سهلين ممكن
تقولهم وانت ف التوبيس ولا وانت طالع السلم او ماشي ف الشارع .......أهم حاجة تتبع السيئة بحسنة تمحيها
استعن بالله ........اعتصم بالله
طيب انا مبصليش اصلا! نتفق على حاجة : انت طبعا عايز من ربنا حاجات كتير
......عايز صحة وفلوس وشغل وشكل كويس ولبس شيك ...... عايز رزق واسع ف كل
حاجة ....عايز لما تتزوج مثلا تطلع طيبة ومحترمة مش نكدية او سمعتها وحشة!
عايز سمعة اسرتك دايما نضيفة! عايز ولادك أصحاء وعايز جيرانك يحترموك
وأساتذتك يعاملوك كويس وتاخدحقوقك في الشغل! .........طيب عايز كل دا وانت
عارف إنه ف إيد ربنا ومعندكش استعداد تقف لله 17 دقيقة في اليوم (بافتراض
إن الركعة ف دقيقة ودا معقول).......طيب بتطلب منه ليه؟
لازم تصلي : شوف واحد صاحبك بيصلي وخليه يشجعك! .......ونرجع تاني للعادات
السيئة : اركن موضوعها على جنب دلوقت لغاية ما تواظب على الصلاة المفروضة!
طيب نركنه خالص؟ لأ لكن شوف طريقة غير الصلاة علشان متتعبش وتزهق!
.......يعني مثلا تصدق بمبلغ كل ما تعمل خطأ......نفس ثمن علبة السجائر
مثلا أو حسب مقدرتك المالية .......عايزين مبلغ يكون ف متناول إيدك لكن ف
نفس الوقت مش تافه علشان ما تبقاش مستهين بيه يعني مثلا إبدأ ب5 أو 10
جنيه (ف المتوسط) واضرب ف 2 كل مرة ......فيه واحد من السلف كان لما يغتاب
الناس يصوم يوم ....لقى الحكاية مش نافعة قال هاتصدق بكذا كل ما اغتاب
واحد .......بيقول : فمن حبي للدراهم تركت الغيبة .........يعني الموضوع
ممكن ينفع!

جرب .....فيه مثل بيقول : من قرع الباب أوشك ان يفتح له!

نيجي للنوع الأول : المدمن -لأي حاجة طبعا- طيب دا مبدئيا الموضوع هيبقى اصعب لكن : It is never too late وبرضه لازم يحاول!
أحيانا ممكن يكون محتاج علاج طبي زي ف حالة المخدرات مثلا ....... لكن
برضه ممكن نساعد بحاجات تانية! زي الطرق اللي فوق وأهم منهاالصيام! صوم
لكن طول مانت صايم خليك صاحي متنامش .......كدا هتفطر وتصلي العشا وتنام!
......كل العادات السيئة -ما عدا شد الشعر وعض الأظافر- محتاجة إنك تكون
مفطر .......خلاص معظم وقت احتكاكك بالناس اللي ممكن تعزم عليك بسيجارة
ولا حاجة تانية هتكون صايم! ميزة الصيام انه قرار بتاخده الصبح وخلاص
فترتاح من صراع الإرادة طول النهار ......يعني لو قلت مش هادخن مثلا لكن
مش صايم هييجي واحد يعزم عليك تقوله لأ يزن لغاية ما تاخدهااو تتعصب
........إنما الصيام هيريحك من الزن وف نفس الوقت قرار واحد كل اليوم مش
كل شوية تفكر! .......يعني الصيف لسه مجاش واليوم قصير فممكن تلحق تعمل
حاجة قبل التوقيت الصيفي!
كمان افتكر حاجة مهمة : نفسك إن لم تشغلها بالحق شغلتك بالباطل!
يعني ما تسيبش نفسك لوقت فراغ.......حاول يكون كل يومك مشغول .......ابذل
مجهود وانتظم في تدريب لأي رياضة .....أولا صحتك تتحسن ثانيا تروح تعبان
تنام ولا سهر ولا خروج ولا اي سبب من اسباب المشاكل! ومحدش يقول هتعطلني
الرياضة عن المذاكرة : ساعة جري بعد الفجر مش هاتعطلك! أخويا كان معاه أول
الدفعة ف الهندسة كل يوم قبل الكلية يلعب إيه؟ تجديف!

وتاني باقول : جرب........حاول 100 مرة .....مليون مرة
......لأن حياتك تستحق ..........وخد بالك : مهماكانت الدنيا كئيبة لازم
تعرف ان الحاجات دي ممكن تخسرك الآخرة كمان ......وإذا كانت الحياة سواء
كئيبة او سعيدة ليها نهاية.. في الاخرة بقى مفيش نهاية : خلود بلا موت!
المسألة مش مواعظ ولا حكم : هي حسبة مكسب وخسارة .....لو اخترت صح وتخليت
عن أي عادة سيئة فرصتك في الفوز بحياة افضل في الدنيا وحال أفضل في الآخرة
تزيد! ولو اخترت غلط انت الخسران أكيد ومفيهاش احتمالات وخسارة مش قليلة
........الجنة فيها مكان والنار فيها مكان تختار إيه؟ أفتكر لو حتى مفيش
منفعة دنيوية -ولو ان فيه كتير- من الاقلاع عن أي عادة سيئة كفاية الآخرة!

أتمنى اللي وصل لغاية نهاية الموضوع ميكونش نادم على انه قراه
.........يعني انا يمكن رغاية شوية (أو شويتين) لكن اتمنى انك تكون استفدت
أي حاجة
ليا عندك طلبين صغيرين : 1-لو عندك أي عادة سيئة (أو حتى معصية متكررة زي
الغيبة) جرب اي طريقة من الطرق اللي فوق ......وابدأ من دلوقت
2- ادعي لي : اقرا بس الدعا دا : اللهم اهدها واغفر لها ولوالديها ولكل صاحب حق عليها واصلح لها في ذريتها وإيانا آمين